ഐസ്ക്രീം എന്നു കേൾക്കുമ്പോഴേ വായില്‍ വെള്ളമൂറും. ഏതു സമയത്തും കഴിക്കാൻ എല്ലാവരും ഇഷ്ടപ്പെടുന്ന ഐസ്ക്രീം കഴിച്ച് ഒരു ദിവസം തുടങ്ങിയാലോ?

പ്രഭാതഭക്ഷണമായി ഐസ്ക്രീം കഴിക്കുന്നത് ആളുകളെ കൂടുതൽ മിടുക്കരും കൂടുതൽ നന്നായി ജോലി ചെയ്യാൻ പ്രാപ്തരും ആക്കുമത്രേ.

ഒരു സംഘം സന്നദ്ധ പ്രവർത്തകരിലാണ് പഠനം നടത്തിയത്. ഒരു ഗ്രൂപ്പിന് ഉണർന്നയുടൻ ഐസ്ക്രീം നൽകി തുടർന്ന് കുറച്ച് പസിലുകളും ചെയ്യാൻ ആവശ്യപ്പെട്ടു. മറ്റൊരു ഗ്രൂപ്പിന് സാധാരണപോലെ പ്രഭാതഭക്ഷണവും നൽകി.

തുടര്‍ന്ന് ഇവരുടെ തലച്ചോറിന്റെ പ്രവർത്തനം അളന്നപ്പോൾ ഐസ്ക്രീം കഴിച്ചവരിൽ ഉയർന്ന ആവൃത്തിയിലുള്ള ആൽഫാ തരംഗങ്ങൾ ഉണ്ടായതായി കണ്ടു. ഇത് കൂടുതൽ ശ്രദ്ധാലു ആക്കുന്നതോടൊപ്പം മാനസിക അസ്വസ്ഥതകളെ കുറയ്ക്കുകയും ചെയ്യുന്നു.

ഐസ്ക്രീം കഴിച്ച ഗ്രൂപ്പ് മികച്ച പ്രകടനം കാഴ്ചവച്ചപ്പോൾ തണുത്ത ഭക്ഷണം കഴിച്ചതു കൊണ്ടാണോ എന്നറിയാൻ മറ്റൊരു ഗ്രൂപ്പ് ആളുകൾക്ക് ഉണർന്നയുടൻ തണുത്ത വെള്ളം നൽകി പരീക്ഷണം ആവർത്തിച്ചെങ്കിലും ഐസ്ക്രീം കഴിച്ച ഗ്രൂപ്പിന്റെ അത്ര മെച്ചപ്പെട്ട പ്രകടനം കാഴ്ചവയ്ക്കാനായില്ല.

2005 ൽ ലണ്ടനിൽ നടത്തിയ പഠനത്തിൽ ഐസ്ക്രീം കഴിക്കുന്നത് ആളുകളിൽ സന്തോഷം ജനിപ്പിക്കുമെന്ന് തെളിഞ്ഞിട്ടുണ്ട്. അത് തലച്ചോറിന്റെ പ്ലഷർ സെന്ററുകളെ ഉദ്ദീപിപ്പിക്കും.

എന്നാല്‍ ഇതിനൊരു മറുവശം കൂടിയുണ്ട്. പഞ്ചസാര ഉപദ്രവകാരിയാണ്. ദീർഘകാലം ഉപയോഗിച്ചാൽ വിഷാദത്തിനും തലച്ചോറിന്റെ പ്രവര്‍ത്തനങ്ങൾ കുറയാനും കാരണമാകും.

ഈ പഠനം കഴിഞ്ഞ നവംബറിൽ ജപ്പാനിലെ ഒരു വെബ്സൈറ്റായ എക്സൈറ്റ് ന്യൂസ് പ്രസിദ്ധീകരിച്ചതാണ്.

മറ്റു രാജ്യങ്ങളിലെ പോഷകാഹാര വിദഗ്ധർ ഇതിനെ അനുകൂലിക്കുന്നില്ല. പഴങ്ങളോ, ധാന്യങ്ങളോ കഴിച്ച് ദിവസം തുടങ്ങുന്നതാണ് ആരോഗ്യകരം എന്നും അവർ നിർദേശിക്കുന്നു.

               

ന്യൂഡല്‍ഹി: ആധാര്‍നമ്പര്‍ ഇല്ലെങ്കില്‍ വൈകാതെ മൊബൈല്‍ നമ്പര്‍ നഷ്ടമാകും. രാജ്യത്തെ എല്ലാ മൊബൈല്‍ നമ്പറുകളും ആധാറുമായി ബന്ധിപ്പിക്കാന്‍ കേന്ദ്ര ടെലികോം മന്ത്രാലയം നടപടി തുടങ്ങി. 2018 ഫെബ്രുവരി ആറിനകം നടപടികള്‍ പൂര്‍ത്തിയാക്കണമെന്ന് ടെലികോം സേവനദാതാക്കളെ മന്ത്രാലയം അറിയിച്ചു. രാജ്യത്തെ എല്ലാ മൊബൈല്‍ ഉപയോക്താക്കളെയും സ്ഥിരീകരിക്കണമെന്ന് സുപ്രീംകോടതി ഉത്തരവിട്ടിരുന്നു. ആധാര്‍ നിര്‍ബന്ധമാക്കണമെന്ന് കോടതി നിര്‍ദേശിച്ചിരുന്നില്ലെങ്കിലും അതാണ് ഏറ്റവും ഫലപ്രദമായ മാര്‍ഗമെന്ന് കേന്ദ്രം നിശ്ചയിച്ചു. സുപ്രീംകോടതി ഉത്തരവും അതിന്റെ നടപടികളും എല്ലാവരെയും മാധ്യമങ്ങളിലൂടെയും എസ്.എം.എസിലൂടെയും അറിയിക്കണം. ഉപയോക്താക്കള്‍ക്ക് വെരിഫിക്കേഷന്‍ കോഡ് എസ്.എം.എസ്. ആയി അയക്കണം. നമ്പര്‍ ഉപയോഗത്തിലുണ്ടെന്ന് ഉറപ്പുവരുത്താനാണിത്. ഇ-കെവൈസി നടപടികള്‍ പൂര്‍ത്തിയായശേഷം വിവരങ്ങള്‍ അന്തിമമായി ഡേറ്റാബേസില്‍ രേഖപ്പെടുത്താന്‍ മൂന്നുദിവസം കാത്തിരിക്കണം. ഇതിനുമുന്നോടിയായി വിവരങ്ങള്‍ ശരിയാണെന്ന് ഉറപ്പാക്കാന്‍ ഉപയോക്താവിന് ഒരു എസ്.എം.എസ്.കൂടി അയക്കണം. ഡേറ്റാ ഉപയോഗത്തിനുമാത്രമായുള്ള നമ്പറുകള്‍ ഉടമസ്ഥന്റെ മറ്റേതെങ്കിലും നമ്പറിലേക്ക് എസ്.എം.എസ്. അയച്ചാണ് സ്ഥിരീകരിക്കേണ്ടത്.

സ്വകാര്യ പൊതുമേഖലാ സ്ഥാപനങ്ങളില്‍ ജോലി ചെയ്യുന്ന സ്ത്രീകളുടെ പ്രസവാവധി 26 ആഴ്ച (6 മാസം) ആക്കിക്കൊണ്ടുള്ള നിയമം ലോക്‌സഭ പാസ്സാക്കി. കഴിഞ്ഞ ശീതകാല സമ്മേളനത്തില്‍ രാജ്യ സഭ ബില്‍ പാസ്സാക്കിയിരുന്നു. 1961ലെ പ്രസവാനുകൂല്യ നിയമം ചില ഭേദഗതികള്‍ വരുത്തി കൊണ്ടുള്ള ബില്‍ ആണ് പാസ്സാക്കിയത്.
നിലവില്‍ മൂന്നു മാസമായി നല്‍കുന്ന പ്രസവാവധി ആറ് മാസമാക്കി കൊണ്ടുള്ളതാണ് ഒരു പ്രധാന ഭേദഗതി. ആദ്യത്തെ രണ്ട് പ്രസവത്തിന് മാത്രമേ ഈ അവധിക്കുള്ള അര്‍ഹതയുണ്ടാവൂ.


ആദ്യത്തെ രണ്ട് പ്രസവത്തിന് ശേഷം ഗര്‍ഭം ധരിക്കുന്നവര്‍ക്ക് മൂന്നു മാസത്തെ അവധി മാത്രമേ ലഭിക്കുകയുള്ളൂ. അമ്പതിലധികം വനിതകളുള്ള സ്ഥാപനങ്ങള്‍ ക്രഷ് സംവിധാനം തുടങ്ങണമെന്ന് നിയമം വ്യവസ്ഥ ചെയ്യുന്നുണ്ട്.
കുട്ടികളെ ജോലിക്കിടയില്‍ നാല് തവണ സന്ദര്‍ശിക്കാനും പാലു കൊടുക്കാനുമുള്ള അവകാശം സ്ത്രീകള്‍ക്ക് ഉണ്ടായിരിക്കണം. എല്ലാ സ്ഥാപനങ്ങളും ഇത്തരം സൗകര്യങ്ങള്‍ നിര്‍ബന്ധമായും ചെയ്തു നല്‍കേണ്ടതാണെന്നും നിയമം അനുശാസിക്കുന്നു.

നോക്കിയായുടെ എക്കാലത്തെയും സൂപ്പർ ഹീറോ 3310 തിരിച്ചുവരുന്നത് പലപല നിറങ്ങളിൽ കൂടിയാണ്.മഞ്ഞ ,വെള്ള ,നീല ,ചുവപ്പ് എന്നി നിറങ്ങളിൽ ആണ് ഇത് എത്തുന്നത്

ലോകവിപണിയിൽ മികച്ച രീതിയിൽ വാണിജ്യം നേടിയ ഒരു നോക്കിയയുടെ മോഡലാണ് 3310 .നോക്കിയ ഇപ്പോൾ 3310 പുതിയ സ്റ്റൈലിഷ് രൂപത്തിൽ പുറത്തിറക്കുന്നു .

2017ന്റെ അവസാനത്തോടുകൂടി ഇത് വിപണിയിൽ എത്തുന്നു .4000 രൂപയ്ക്കു അടുത്തായിരിക്കും ഇതിന്റെ വിപണിയിലെ വില .

നോക്കിയായുടെ 6 ഉടൻ തന്നെ ഇന്ത്യൻ വിപണിയിൽ എത്തുമെന്നാണ് സൂചനകൾ .കുറഞ്ഞ ചിലവിൽ സ്മാർട്ട് ഫോണുകൾ ഇറക്കി 2017 ന്റെ വിപണി തിരിച്ചുപിടിക്കാൻ ഒരുങ്ങുകയാണ് നോക്കിയ 

ദുബായ്: കഴിഞ്ഞ ഒരു വര്‍ഷത്തിനിടയില്‍ ദുബായ് അന്താരാഷ്ട്ര വിമാനത്താവളത്തില്‍ നിന്ന് 718 വ്യാജ പാസ്‌പോര്‍ട്ടുകള്‍ പിടികൂടിയിട്ടുണ്ടെന്ന് ദുബായ് ഇമിഗ്രേഷന്‍ അറിയിച്ചു. 2016 ജനുവരി മുതല്‍ 2017 ജനുവരി വരെയുള്ള കാലയളവിലാണ് ഇത്രയും കൃത്രിമ പാസ്‌പോര്‍ട്ടുകള്‍ കണ്ടെത്തിയത്. തിരുത്തലുകള്‍ വരുത്തിയ 20 പാസ്‌പോര്‍ട്ടും ആള്‍മാറാട്ടം നടത്തിയ 417 പേരെയും പിടികൂടിയിട്ടുണ്ട്. ഇമിഗ്രേഷന്‍ വകുപ്പിനുകീഴിലുള്ള രേഖാ പരിശോധനാ കേന്ദ്രത്തിന്റെ സഹായത്തോടെയാണ് പാസ്‌പോര്‍ട്ടുകളിലെ വ്യാജന്മാരെ കണ്ടെത്തിയത്. വ്യാജ യാത്രാരേഖകള്‍ എളുപ്പത്തില്‍ തിരിച്ചറിയുന്നതിനുള്ള നൂതന സംവിധാനങ്ങള്‍ ഇവിടെ സജ്ജീകരിച്ചിട്ടുണ്ട്. ദുബായ് അന്താരാഷ്ട്ര വിമാനത്താവളത്തിലൂടെമാത്രം ദിനംപ്രതി 1,40,000-ത്തിലധികം യാത്രികരാണ് കടന്നുപോകുന്നത്. എക്‌സ്‌പോയ്ക്കായി എത്തുന്ന ലക്ഷക്കണക്കിന് സഞ്ചാരികളെക്കൂടി മുന്നില്‍കണ്ടാണ് ഇത്തരം സംവിധാനങ്ങള്‍ ഒരുക്കിയതെന്ന് രേഖാപരിശോധനാ വിഭാഗം തലവന്‍ അഖീല്‍ അഹമ്മദ് അല്‍ നജ്ജാര്‍ പറഞ്ഞു. സുരക്ഷാസംവിധാനം ശക്തമാക്കുന്നതിനും യാത്രികരുടെ രേഖകള്‍ കൃത്യമായി പരിശോധിച്ച് ഉറപ്പുവരുത്താനും ഇത് സഹായകമാകും.

ഇതിനായി പ്രത്യേക പരിശീലനം ലഭിച്ച 1,700 ജീവനക്കാരെ നിയോഗിച്ചിട്ടുണ്ട്. ഇവര്‍ക്ക് അഞ്ചുമിനിറ്റ് കൊണ്ട് കൃത്രിമ പാസ്‌പോര്‍ട്ടുകള്‍ തിരിച്ചറിയാനാകും. വല്ല സംശയവും തോന്നിയാല്‍ മേല്‍ ഘടകത്തിന് കൈമാറും. ഇവരാണ് സാങ്കേതിക സംവിധാനങ്ങളുടെ സഹായത്തോടെ പരിശോധന നടത്തുക. ഓരോ രാജ്യവും തങ്ങളുടെ പാസ്‌പോര്‍ട്ടില്‍ 19-ലധികം സുരക്ഷാ ക്രമീകരണങ്ങള്‍ നടത്തിയിട്ടുണ്ടാകും. ഇത് കണ്ടെത്തി യഥാര്‍ഥ പാസ്‌പോര്‍ട്ടുകള്‍ തിരിച്ചറിയുന്നതിനും ഉദ്യോഗസ്ഥര്‍ക്ക് സാധിക്കും. യാത്രികരുടെ ശരീരിക ചലനങ്ങളില്‍ വരുന്ന മാറ്റം വരെ ഇവര്‍ നിരീക്ഷിക്കും. ഇത്തരത്തില്‍, സംശയം തോന്നിയവരില്‍ 66 ശതമാനവും വ്യാജ രേഖകളുമായി വന്നവരാണെന്ന് സ്ഥിരീകരിക്കപ്പെട്ടിട്ടുണ്ട്.