Kerala Blasters FC

2nd in Indian Super League

ISL Final
Tomorrow, 7:00 PM
Jawaharlal Nehru Stadium

ദൂരപരിധി: സംസ്ഥാനത്ത് 90 ശതമാനം മദ്യശാലകളും മാറ്റേണ്ടിവരും 

 സുപ്രീംകോടതി വിധിയുടെ അടിസ്ഥാനത്തില്‍, സംസ്ഥാനത്ത് പ്രവര്‍ത്തിക്കുന്ന ബിവറേജസ് കോര്‍പ്പറേഷന്റെയും കണ്‍സ്യൂമര്‍ഫെഡിന്റെയും മദ്യവില്പനശാലകളില്‍ 90 ശതമാനവും മാറ്റേണ്ടിവരും. ദേശീയ-സംസ്ഥാന പാതകളില്‍നിന്നും 500 മീറ്റര്‍ അകലെമാത്രമേ പുതിയ മദ്യശാലകള്‍ പ്രവര്‍ത്തിക്കാവൂയെന്നാണ് വിധി.
ദേശീയ, സംസ്ഥാന പാതകളുടെ സമീപത്ത് പ്രവര്‍ത്തിക്കുന്ന പഞ്ചനക്ഷത്ര ഹോട്ടലുകളിലെ ബാറുകളെയും ബാധിക്കുമോയെന്ന കാര്യത്തില്‍ വ്യക്തത വന്നിട്ടില്ല. ഏതെല്ലാം മദ്യശാലകളുടെ ലൈസന്‍സ് റദ്ദാക്കണമെന്നറിയാന്‍ എക്‌സൈസ് വകുപ്പ് കണക്കെടുപ്പ് തുടങ്ങി. ദേശീയ, സംസ്ഥാന പാതകളില്‍നിന്ന് മദ്യശാലകളിലേക്കുള്ള ദൂരവും അളന്നുതുടങ്ങി.
ബിവറേജസ് കോര്‍പ്പറേഷന് 270 മദ്യവില്പനശാലകളും കണ്‍സ്യൂമര്‍ഫെഡിന് 39 മദ്യവില്പന ശാലകളുമാണ് ഉള്ളത്. ദേശീയ, സംസ്ഥാന പാതകളിലെ ബൈപ്പാസുകള്‍ സംബന്ധിച്ച് ചില അവ്യക്തതകളുണ്ട്. ബൈപ്പാസുകളില്‍ പ്രവര്‍ത്തിക്കുന്ന മദ്യശാലകള്‍ക്ക് കോടതിവിധി ബാധകമാകുമോയെന്ന് വ്യക്തമല്ല. ഇക്കാര്യത്തില്‍ വ്യക്തത വന്നാല്‍മാത്രമേ എത്ര എണ്ണം കൃത്യമായി മാറ്റേണ്ടിവരുമെന്നറിയാനാകൂ.
സുപ്രീംകോടതിയിലെ കേസില്‍ സംസ്ഥാന സര്‍ക്കാര്‍ കക്ഷിയായിരുന്നില്ല. തമിഴ്‌നാട്ടിലെ ചില്ലറ മദ്യവില്പന കേന്ദ്രങ്ങളുമായി ബന്ധപ്പെട്ട തര്‍ക്കമാണ് വിധിക്ക് ഇടയാക്കിയത്. വിധിപ്പകര്‍പ്പ് ലഭിച്ചശേഷമേ കേരളത്തില്‍ അതെങ്ങനെ ബാധിക്കുമെന്ന് അറിയാനാകൂവെന്ന് എക്‌സൈസ് അധികൃതര്‍ പറഞ്ഞു. നിലവിലെ ലൈസന്‍സ് പ്രകാരം മാര്‍ച്ച് 31 വരെ ഇപ്പോഴത്തെ സ്ഥലത്ത് പ്രവര്‍ത്തിക്കാം.
വാഹനാപകടങ്ങള്‍ ഉണ്ടാകുന്നതിന്റെ പ്രധാന കാരണം മദ്യപിച്ച് വാഹനമോടിക്കുന്നതാണെന്ന് കണ്ടെത്തലിനെത്തുടര്‍ന്നാണ് കോടതിവിധി. ദേശീയ പാതയുടെ 500 മീറ്റര്‍ പരിധിയില്‍ മദ്യക്കച്ചവടം പാടില്ലെന്നത് ബാറുകള്‍ക്കും ബിയര്‍ പാര്‍ലറുകള്‍ക്കും ബാധകമാകാന്‍ ഇടയുണ്ട്. മുമ്പ് ഹൈക്കോടതി ദേശീയപാതയുടെ 100 മീറ്റര്‍ പരിധിയില്‍ മദ്യഷാപ്പ് പാടില്ലെന്ന് വിധിച്ചിരുന്നു. എന്നാല്‍, അത് പുതിയ ലൈസന്‍സിനുമാത്രമേ ബാധമാക്കിയുള്ളൂ. നിലവിലെ ലൈസന്‍സ് പുതുക്കുന്നതിന് ഇത് ബാധകമായിരുന്നില്ല.
എന്നാല്‍, സുപ്രീംകോടതി വിധിയനുസരിച്ച് ഏപ്രില്‍ ഒന്നുമുതല്‍ ദേശീയ, സംസ്ഥാന പാതകളുടെ 500 മീറ്റര്‍ പരിധിയില്‍ മദ്യശാലകള്‍ പാടില്ല. വിധി നടപ്പാക്കിയ റിപ്പോര്‍ട്ട് ഒരുമാസത്തിനകം ചീഫ് സെക്രട്ടറി കോടതിയെ അറിയിക്കുകയും വേണം.

ബംഗാള്‍ ഉള്‍ക്കടലില്‍ രൂപപ്പെട്ട വര്‍ധ ചുഴലിക്കാറ്റ് ചെന്നൈ തീരത്തേക്ക്. ചുഴലിക്കാറ്റിനെത്തുടര്‍ന്നു നഗരത്തിന്റെ വിവിധ ഭാഗങ്ങളിൽ കനത്തമഴയും കാറ്റും പുലർച്ചെ മുതൽ തുടരുകയാണ്. മണിക്കൂറില്‍ 100 കിലോമീറ്റര്‍ വേഗതയില്‍ ചുഴലിക്കാറ്റുണ്ടാകുമെന്നു കാലാവസ്ഥാ നിരീക്ഷണ കേന്ദ്രം മുന്നറിയിപ്പു നല്‍കി. കേരളത്തിെല വടക്കന്‍ ജില്ലകളില്‍ മഴയ്ക്കു സാധ്യതയുണ്ടെന്നും കാലാവസ്ഥാ നിരീക്ഷ കേന്ദ്രം ഡപ്യൂട്ടി ഡയറക്ടര്‍ ജനറല്‍ ബാഹുലേയന്‍ തമ്പി മനോരമ ന്യൂസിനോടു പറഞ്ഞു. ചെന്നൈ അടക്കമുള്ള നാലു ജില്ലകളിലെ വിദ്യാഭ്യാസ സ്ഥാപനങ്ങള്‍ക്ക് ഇന്ന് അവധി പ്രഖ്യാപിച്ചു. ഒരു ട്രെയിൻ പൂർണമായും റദ്ദാക്കി.

ചെന്നൈയ്ക്കും നെല്ലൂരിനും ഇടയില്‍ തിങ്കളാഴ്ച വൈകിട്ട് നാലരയോടെ വര്‍ധ തീരത്തേക്കു കടക്കും. തുടര്‍ന്ന് അടുത്ത 24 മണിക്കൂര്‍ ചെന്നൈ, കാഞ്ചിപുരം, തിരുവണ്ണാമല എന്നിവിടങ്ങളില്‍ ‍15 മുതല്‍ 25 സെന്‍റിമീറ്റര്‍ വരെ കനത്ത മഴ ഉണ്ടാകും. 80 മുതല്‍ 90 കിലോമീറ്റര്‍ വരെ വേഗതയിലുള്ള ചുഴലിക്കാറ്റ് നാശ നഷ്ടങ്ങള്‍ ഉണ്ടാക്കാന്‍ സാധ്യതയുണ്ട്.

രണ്ടു ദിവസത്തിനുള്ളില്‍ കേരളത്തിലെ വടക്കന്‍ ജില്ലകളിലും മഴയുണ്ടാകും. മല്‍സ്യതൊഴിലാളികളോടു കടലില്‍ പോകരുതെന്നു നിര്‍ദേശം നല്‍കിയിട്ടുണ്ട്. തീരപ്രദേശത്തുള്ളവര്‍ ജാഗ്രത പാലിക്കണം. അടിയന്തര സാഹചര്യം നേരിടാന്‍ നാവികസേനയോടും ദേശീയ ദുരന്ത നിവാരണസേനയോടും തയാറായി നില്‍ക്കാന്‍ നിര്‍ദേശം നല്‍കി. ഹെലികോപ്റ്ററുകളും കപ്പലുകളും രക്ഷാപ്രവര്‍ത്തനത്തിന് ഒരുങ്ങിയതായി നാവികസേന അറിയിച്ചു.

ജയലളിതയ്ക്ക് തമിഴകത്തിന്റെ അന്ത്യാഞ്ജലി. ഭൗതികശരീരം പൂര്‍ണ ഔദ്യോഗിക ബഹുമതികളോടെ സംസ്‌കരിച്ചു. ചെന്നൈ മറീന ബീച്ചിലെ അണ്ണാദുരൈയുടേയും എം.ജി.ആറിന്റേയും സ്മൃതിമണ്ഡപത്തിന് മധ്യേയായി സജ്ജീകരിച്ച സ്ഥലത്താണ് മൃതദേഹം അടക്കം ചെയ്തത്. ചന്ദനത്തടിയില്‍ തീര്‍ത്ത പേടകത്തിലാണ് മൃതദേഹം അടക്കം ചെയ്തത്.
അമ്മയെ അവസാനമായി ഒരു തവണകൂടി കാണാനായി തമിഴ്മക്കള്‍ കൂട്ടമായി മൃതശരീരം പൊതുദര്‍ശനത്തിന് വച്ച രാജാജി ഹാളിലേക്ക് ഒഴുകിയെത്തി. പലരും സങ്കടം സഹിക്കാനാകാതെ വിതുമ്പി. ചിലര്‍ വാവിട്ട് നിലവിളിച്ചു. 4.15 ഓടെ പൊതുദര്‍ശനം അവസാനിപ്പിച്ച് സംസ്‌കാരത്തിനായി മൃതദേഹം രാജാജി ഹാളില്‍ നിന്ന് നീക്കുമ്പോഴും വന്‍ ജനാവലി അവിടെ തമ്പടിച്ചിരുന്നു. മൃതദേഹവും വഹിച്ചുകൊണ്ടുള്ള വാഹനം കടന്നുപോയ വഴിയുടെ ഇരുവശവും ജനസമുദ്രമായി മാറി. ഒരുമണിക്കൂര്‍ നേരമെടുത്താണ് മറീനബീച്ചിലെ സംസ്‌കാരസ്ഥലത്ത് മൃതദേഹം എത്തിക്കാനായത്. ഹിന്ദു ആചാരപ്രകാരമുള്ള അന്ത്യകര്‍മ്മങ്ങള്‍ ചെയ്തത് തോഴി ശശികലയായിരുന്നു. വൈകുന്നേരം 6.05 ഓടെ മൃതദേഹം അടക്കം ചെയ്തു.