ഇന്ത്യൻ സൈന്യം

ഇന്ത്യ–പാക്ക് ബന്ധം വഷളായ സാഹചര്യത്തിൽ നിയന്ത്രണരേഖയ്ക്ക് സമീപം വെടിനിർത്തൽ കരാർ ലംഘിക്കുന്ന പാക്കിസ്ഥാന് ശക്തമായ മറുപടിയുമായി ഇന്ത്യ.ഇന്ത്യൻ സൈനികർ പാക്ക് സൈനികർക്കുനേരെ വെടിയുതിർക്കുന്നുവെന്ന് പാക്കിസ്ഥാൻ സൈനിക വക്താവ് ലഫ്.ജനറൽ അസിം ബജ്‍വ പറഞ്ഞു. ചൈനീസ് മാധ്യമമായ സിൻഹുവയ്ക്ക് നൽകിയ അഭിമുഖത്തിലാണ് ഇന്റർ–സർവീസസ് പബ്ലിക് റിലേഷൻസ് (ഐഎസ്പിആർ) ഡയറക്ടർ ജനറൽ അസിം ബജ്‍വയുടെ ആരോപണം.

സെപ്റ്റംബർ 29ന് ഇന്ത്യ നടത്തിയ മിന്നലാക്രമണത്തിനുശേഷം എല്ലാ ദിവസവും രാത്രിയിൽ ഇന്ത്യൻ സൈന്യം പാക്ക് സൈനികർക്കു നേരെ വെടിയുതിർക്കുകയാണെന്ന് അദ്ദേഹം ആരോപിച്ചു. ബുധനാഴ്ച ഇന്ത്യയുടെ ഭാഗത്തുനിന്നുള്ള വെടിവയ്പ്പ് രൂക്ഷമായിരുന്നുവെന്നും ബജ്‍വ പറഞ്ഞു. വിവിധ തരത്തിലുള്ള ആയുധങ്ങളും തോക്കുകളും ഷെല്ലുകളും ഉപയോഗിച്ച് ഏതാണ്ട് 25,000 റൗണ്ടാണ് ഇന്ത്യൻ സൈന്യം വെടിയുതിർത്തതെന്ന് അദ്ദേഹം ആരോപിച്ചു.

മിന്നലാക്രമണം നടത്തിയെന്ന ഇന്ത്യയുടെ വാദം തെറ്റാണെന്നു ബജ്‍വ വീണ്ടും അവകാശപ്പെട്ടു. സ്ഥലം സന്ദർശിച്ചുവെന്നും തെറ്റായി ഒന്നും കണ്ടില്ലെന്നും അദ്ദേഹം വീണ്ടും പറഞ്ഞു. ഇന്ത്യ മിന്നലാക്രമണം നടത്തിയിട്ടില്ലെന്നാണ് പാക്കിസ്ഥാന്റെ വാദം. എന്നാൽ, ഇന്ത്യ മിന്നലാക്രമണം നടത്തിയതിന്റെ തെളിവുകൾ ദേശീയ മാധ്യമങ്ങൾ പുറത്തുവിട്ടിരുന്നു. പാക്ക് അധിനിവേശ കശ്മീരിലെ പൊലീസ് ഉദ്യോഗസ്ഥന്റെയും ദൃക്സാക്ഷികളുടെയും പ്രതികരണങ്ങളാണ് പുറത്തുവന്നത്.

എല്ലാ അയൽ രാജ്യങ്ങളുമായി സമാധാനപരമായ ബന്ധമാണ് ആഗ്രഹിക്കുന്നതെന്നും അസിം ബജ്‍വ പറഞ്ഞു. ഇരു രാജ്യങ്ങളുടെയും സൈനിക തലത്തിലുള്ള ഹോട്ട് ലൈൻ ഉൾപ്പെടെ എല്ലാ സംവിധാനങ്ങളും ഇപ്പോഴും തുറന്നു കിടക്കുകയാണെന്നും അദ്ദേഹം വ്യക്തമാക്കി.

മിന്നലാക്രമണത്തിനുശേഷം പാക്കിസ്ഥാൻ സൈന്യം ഇന്ത്യൻ പോസ്റ്റുകൾക്ക് നേരെ 25 തവണയാണ് വെടിയുതിർത്തതെന്ന് ഇന്ത്യൻ സൈന്യം അറിയിച്ചിരുന്നു. മൂന്നു സൈനികർക്കും ഏതാനും പ്രദേശവാസികൾക്കും നിസാര പരുക്കേറ്റു. പാക്കിസ്ഥാന് കൃത്യമായ മറുപടി നൽകിയെന്നും ഇന്ത്യൻ സൈനിക വക്താവ് അറിയിച്ചിരുന്നു. 

ഇന്ത്യ-പാക്ക് അതിർത്തി. (ഫയൽ ചിത്രം)

ഇന്ത്യ- പാക്കിസ്ഥാൻ രാജ്യാന്തര അതിർത്തി പൂർണമായും അടയ്ക്കുമെന്ന് കേന്ദ്ര ആഭ്യന്തരമന്ത്രി രാജ്നാഥ് സിങ്. 2018 നകം തീരുമാനം പൂർണമായും നടപ്പാക്കും. അതിർത്തി സംസ്ഥാനങ്ങളെ ഉൾപ്പെടുത്തി ബോർഡർ സെക്യൂരിറ്റി ഗ്രിഡ് സ്ഥാപിക്കാനും തീരുമാനിച്ചതായി അദ്ദേഹം പറഞ്ഞു. അതിർത്തി സംസ്ഥാനങ്ങളായ ജമ്മു കശ്മീർ, പഞ്ചാബ്, രാജസ്ഥാൻ, ഗുജറാത്ത് എന്നിവിടങ്ങളിലെ മുഖ്യമന്ത്രിമാരുമായും ആഭ്യന്തര മന്ത്രിമാരുമായും നടത്തിയ ചർച്ചയ്ക്കുശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.

ഇസ്രയേൽ മോഡൽ മതിൽ കെട്ടി അതിർത്തി അടയ്ക്കാൻ കഴിയുമോ എന്നതിന്റെ സാധ്യതകളാണ് ഇന്ത്യ ഇപ്പോൾ പരിശോധിക്കുന്നത്. എന്നാൽ പഞ്ചാബ്, ജമ്മു കശ്മീർ പോലുള്ള സംസ്ഥാനങ്ങളിൽ ഇതു നടപ്പിലാക്കാൻ ബുദ്ധിമുട്ടുണ്ട്. പദ്ധതി പ്രാവർത്തികമായാൽ വലിയ രീതിയിൽ നുഴഞ്ഞുകയറ്റം തടയാനാകുമെന്നാണ് സർക്കാർ വിലയിരുത്തൽ.

ഉറി ഭീകരാക്രമണത്തെത്തുടർന്ന് ഇരുരാജ്യങ്ങളും തമ്മിലുള്ള ബന്ധത്തിൽ വിള്ളൽ വന്നതോടെയാണ് അതിർത്തി പൂർണമായും അടയ്ക്കാൻ സർക്കാർ ആലോചിച്ചത്. 2,300 കിലോമീറ്റർ നീളമുള്ള അതിർത്തി അടയ്ക്കാനാണ് പദ്ധതി. ഒന്നോ രണ്ടോ ചെക്പോയിന്റുകളിലേക്ക് ചരക്ക്, ഗതാഗത സംവിധാനങ്ങൾ പരിമിതപ്പെടുത്തി പരിശോധന ശക്തിപ്പെടുത്താനും തീരുമാനിച്ചിരുന്നു.

നുഴഞ്ഞുക്കയറ്റം തടയാൻ അതിർത്തിയിൽ മുള്ളുവേലി കെട്ടുന്നത് ഇതുവരെ പൂർത്തിയായിട്ടില്ല. ഇതു എത്രയും വേഗം പൂർത്തിയാക്കി നുഴഞ്ഞുകയറ്റം പൂർണമായും തടയാനാണ് ഇന്ത്യ ഇപ്പോൾ തീരുമാനിച്ചിരിക്കുന്നത്. നുഴഞ്ഞുകയറുന്ന ഭീകരർ അതിർത്തി സംസ്ഥാനങ്ങളിലെ വിമാനത്താവളം ഉൾപ്പെടെയുള്ളവ ലക്ഷ്യം വയ്ക്കുകയാണെന്ന് ഇന്റലിജന്റ്സ് റിപ്പോർട്ടുകളുണ്ട്. 

ന്യൂ‍ഡൽഹി∙ സൗമ്യ വധക്കേസിൽ പ്രോസിക്യൂഷനു ഗുരുതര വീഴ്ച പറ്റിയെന്ന് സുപ്രീംകോടതി. വിചാരണവേളയിൽ ഹാജരാക്കിയ സാക്ഷിമൊഴികൾ വിശ്വസിക്കണോ അതോ ഡോക്ടറുടെ മൊഴി വിശ്വസിക്കണോയെന്ന് കോടതി ചോദിച്ചു. കുറ്റം ചെയ്തതെന്ന് 101 ശതമാനം ഉറപ്പുണ്ടെങ്കിൽ മാത്രമേ വധശിക്ഷ വിധിക്കാനാകൂ. സംശയത്തിന്റെ കണികപോലും ഉണ്ടെങ്കിൽ വധശിക്ഷ നൽകാനാകില്ലെന്നും കോടതി പറഞ്ഞു. സൗമ്യ ട്രെയിനിൽനിന്ന് രക്ഷപെട്ടതായി രണ്ടുപേർ മൊഴി നൽകി. ഈ മൊഴികൾ എങ്ങനെ വിശ്വസിക്കാതിരിക്കും. സാക്ഷിമൊഴി വിശ്വാസത്തിലെടുത്താണ് വധശിക്ഷ ഒഴിവാക്കിയത്– കോടതി വ്യക്തമാക്കി.

സൗമ്യ വധക്കേസിലെ പ്രതി ഗോവിന്ദച്ചാമിയെ കൊലക്കുറ്റത്തിൽനിന്ന് ഒഴിവാക്കി വധശിക്ഷ റദ്ദാക്കിയതിനെതിരെ സംസ്‌ഥാന സർക്കാരും സൗമ്യയുടെ അമ്മ സുമതി ഗണേശും നൽകിയ പുനഃപരിശോധനാ ഹർജികളാണ് സുപ്രീംകോടതി ഇന്നു പരിഗണിച്ചത്. തുറന്ന കോടതിയിലായിരുന്നു കേസിന്റെ വാദം കേൾക്കൽ.

അതേസമയം, കേസ് പഠിക്കാൻ കൂടുതൽ സമയം വേണമെന്ന് സർക്കാരും സൗമ്യയുടെ അമ്മ സുമതിയുടെ അഭിഭാഷകനും ആവശ്യപ്പെട്ടു. ഇതേത്തുടർന്ന് കേസ് പരിഗണിക്കുന്നത് കോടതി 17 ലേക്കു മാറ്റി.

സൗമ്യയെ ട്രെയിനിൽനിന്നു തള്ളിയിട്ടെന്നായിരുന്നു വിചാരണക്കോടതിയിലും ഹൈക്കോടതിയിലും സുപ്രീംകോടതിയിലും പ്രോസിക്യൂഷന്റെ നിലപാട്. സൗമ്യ ചാടി രക്ഷപ്പെടുന്നതായി കണ്ടെന്ന് ഒരു മധ്യവയസ്‌കൻ പറഞ്ഞതായി ടോമി ദേവസി (നാലാം സാക്ഷി), അബ്‌ദുൽ ഷുക്കൂർ (40–ാം  സാക്ഷി) എന്നിവർ നൽകിയ മൊഴിയും പ്രാധാന്യത്തോടെ ഉന്നയിച്ചു. മൊഴികളിലെയും വാദത്തിലെയും വൈരുധ്യം എടുത്തുകാട്ടിയാണ് കോടതി കൊലക്കുറ്റം ഒഴിവാക്കിയത്.

ഇസ്‌ലാമാബാദ് ∙ കറാച്ചിക്കും ലാഹോറിനും മുകളിലൂടെ പറക്കുന്ന വിമാനങ്ങൾക്ക് പാക്കിസ്ഥാൻ ഭാഗിക നിരോധനം ഏർപ്പെടുത്തി. ഒക്ടോബർ എട്ടു മുതൽ കറാച്ചിയിലെയും ലാഹോറിലെയും വ്യോമമേഖല 18 മണിക്കൂർ അടച്ചിടും. 13 ദിവസത്തേക്കാണ് ഈ നടപടിയെന്ന് പാക്കിസ്ഥാൻ പുറത്തിറക്കിയ നോട്ടീസിൽ പറയുന്നു. ഇന്ത്യയെ ലക്ഷ്യമിട്ടാണ് ഈ നീക്കം. പാക്ക് സൈനിക വിമാനങ്ങൾ പരിശീലനം നടത്തുന്നതുകൊണ്ടാണ് നിരോധനമെന്നാണ് ഔദ്യോഗിക ഭാഷ്യം.

ഇന്ത്യ-പാക്ക് ബന്ധം വഷളായ സാഹചര്യത്തിൽ പുതിയ നീക്കങ്ങൾ ഇന്ത്യയെ ഉദ്ദേശിച്ചാണെന്ന് വ്യക്തമാണ്. രാജസ്ഥാൻ, ഗുജറാത്ത് അതിർത്തികളിൽ നിന്നു വളരെയടുത്താണ് കറാച്ചി. ലാഹോറാകട്ടെ ജമ്മു കശ്മീരിനോടും പഞ്ചാബിനോടും അടുത്തു കിടക്കുന്ന സ്ഥലവും. ഇന്ത്യയിൽ നിന്നുള്ള മിക്കവാറും വിമാനങ്ങൾ പടിഞ്ഞാറൻ രാജ്യങ്ങളിലേക്കും ഗൾഫ് രാജ്യങ്ങളിലേക്കും പാക്കിസ്ഥാനു മുകളിലൂടെയാണ് പറക്കുന്നത്. ഏറെ ചെലവുകുറഞ്ഞ ഒരു വ്യോമപാതയാണിത്.

എന്നാൽ, പുതിയ സാഹചര്യത്തിൽ ഈ മേഖലയിലെ യാത്രയ്ക്ക് മറ്റൊരു വഴി കാണേണ്ടിയിരിക്കുന്നു. ചൈനയുടെ വ്യോമാതിർത്തി വഴി മറ്റൊരു മാർഗമുണ്ടെങ്കിലും അഹമ്മദാബാദ് വഴി അറബിക്കടലിനു മുകളിലൂടെയുള്ള യാത്രയാണ് ഇന്ത്യ തിരഞ്ഞെടുക്കുകയെന്നാണ് കരുതുന്നത്.

അനുശാന്തിയുടെ ഭർത്താവ് ലിജേഷ്

കെഎസ്ആർടിസി

തിരുവനന്തപുരം∙ കെഎസ്ആർടിസി ജീവനക്കാർക്കു ശമ്പളം നൽകേണ്ട ബാധ്യത സർക്കാരിനില്ലെന്ന് ഗതാഗതമന്ത്രി എ.കെ.ശശീന്ദ്രൻ. കെഎസ്ആർടിസിക്കാണ് ഇതു നൽകേണ്ട ഉത്തരവാദിത്തം. പ്രതിസന്ധി തുടരുന്നതാണ് ശമ്പളം മുടങ്ങാൻ കാരണം.

സമരം തെറ്റെന്നു പറയുന്നില്ലെങ്കിലും പ്രതിസന്ധിയുള്ളപ്പോൾ‌ സർവീസ് മുടക്കുന്നത് ശരിയാണോയെന്ന് ജീവനക്കാർ ആലോചിക്കണം. പെൻഷൻ കൊടുക്കുന്ന കാര്യത്തിൽ മാത്രമാണ് അൻപതു ശതമാനം ബാധ്യത സർക്കാർ ഏറ്റെടുത്തിട്ടുള്ളതെന്നും മന്ത്രി പറഞ്ഞു.

അതേസമയം, കെഎസ്ആർടിസിയിൽ ഇന്നു ശമ്പളം നൽകുമെന്നും ശശീന്ദ്രൻ പറഞ്ഞു. എസ്ബിടിയിൽനിന്ന് വായ്പയെടുക്കാൻ അടിയന്തര ചർച്ച നടത്തുകയാണ്. ഉടൻ ഇക്കാര്യത്തിൽ തീരുമാനമാകുമെന്നാണു പ്രതീക്ഷയെന്നും അദ്ദേഹം വ്യക്തമാക്കി.